ភ្នំពេញ៖ របាយការណ៍បូកសរុបការងារក្រសួងពាណិជ្ជកម្មឆ្នាំ២០២១ បង្ហាញថាការនាំចេញរបស់កម្ពុជាក្នុងរយៈពេល១០ខែនៃឆ្នាំ២០២១ បានចំនួន ១៤ ២៨៦លានដុល្លាអាមេរិក ថយចុះ២% ខណៈការនាំចូលសម្រេចបានទឹកប្រាក់ ២៣ ០៦០លានដុល្លារអាមេរិក ដែលមានការកើនឡើង៥៨%បើប្រៀបធៀបនឹងរយៈពេលដូចគ្នាក្នុងឆ្នាំ២០២០។
យោងតាមរបាយការណ៍ ប្រទេសដែលកម្ពុជានាំចេញទៅច្រើនជាងគេគឺ សហរដ្ឋអាមេរិកដែលមានទំហំជាង៦ពាន់លានដុល្លារ សហភាពអឺរ៉ុបជាង២ពាន់៦រយលានដុល្លារអាមេរិក និងចិនជាង១ពាន់លានដុល្លារអាមេរិក។ ចំពោះប្រទេសដែលនាំចូលកម្ពុជាច្រើនជាងមាន អាស៊ានជាង១ម៉ឺនលានដុល្លារអាមេរិក និងប្រទេសចិនជិត៨ពាន់លានដុល្លារអាមេរិក។
សម្ភារៈដែលកម្ពុជានាំចេញទៅពិភពលោកច្រើនជាងគេគឺសម្លៀកបំពាក់ ស្បែកជើង សម្ភារៈធ្វើដំណើរ ម៉ាស៊ីនបរិធាន និងសម្ភារៈអគ្គិសនី ខណៈទំនិញនាំចូលកម្ពុជាមាន វាយនភ័ណ្ឌ សម្ភារៈសំណង់ និងដែក។
អ្នកនាំពាក្យក្រសួងពាណិជ្ជកម្មលោក ស៊ាង ថៃ ថាលោកមិនទាន់អាចបញ្ជាក់ពីមូលហេតុអ្វីដែលធ្វើឱ្យការនាំចូលកើនឡើងច្រើនខណៈការនាំចេញធ្លាក់ចុះនៅឡើយទេដោយសុំពេលពិនិត្យលើឯកសារសិន៕
